El Joker - Fora2 Salonat l الجوكر - فراق صالونات

الــكــلــمــات

راجع نفسه وهو بيقفل الببيون
كان مندمج لحد قبل فرحكوا بيوم
سأل سؤال لو سألتيه عمرك ما تضيعي
انا هنا لأني عايز ، ولا لإن ده الطبيعي

خلص تعليم ، وكوّن نفسه ، وشعره أبيّض سنه
أهله قالوا: يابني نفرح بيك خلاص كبرنا
وأختاروكي عشان جميلة ، وبنت ناس ، ومتعلمة
قعدة .. التانيه .. إتشد ليكي ، وقام ملبس دبل

عمره ما حس لحظة واحدة إنك بتكمليه
الحكاية إنك ناسبتي شكل حياة لازم يبنيه
كان بيطمن نفسه بإن الحب بيتولد بالعشرة
وإن جوهر العلاقة توازن ، وإن العشق قشرة

فاق ، وفكر في اللي جاي بمنطقية
ملايين بمواصفاتها يبقى اشمعنى هي ؟
لو خسرت ميزة .. هفضل راضي بيها ؟
لو شفت واحده أحسن .. ليه متشدش ليها ؟


انتي كمان من صُغرك ماختارتيش حاجه بمزاجك
سيبتيهم يخترعوكي ، بدل ما تسعي لإكتشافك
قالولك كُليات القمة ، يا إما تبوظ حياتك
وانتي ما شاء الله دخلتي طب بإجتهادك

وبقيتي في ركن خلى عدد إختياراتك قليل
الدكتورة تتجوز دكتور ، يا مهندس بالميت
وبقربك مـ التلاتين إتزنئتي في ركن جديد
قطر الجواز هيفوتك ، وانتي لازم تلحقيه

جه وكان باين فيه معظم شروطك في البداية
مع الوقت ظهرت العيوب ، وغطت عـ المزايا
وفشلتي تغيريه ، فبدأتي تحاولي تقبليه
مفيش رجوع خلاص .. بقالكوا سنة أهو مخطوبين

مـ النقطه دي مكانش ، ولا هيكون بينكوا إلا كبت
كان لازم طرف منكوا يرجع مهما كان الوقت
وأهو دلوقتي أفضل من بعدين ، وانتوا لسه اتنين
أحسن ما تاخدوا طفل في الرجلين ، وبكره تقولي صدقت
_______________________________________

Fora2 Salonat

Lyrics: El Joker
Vocals: El Joker
Music: Karim A. Nabih
Master & mix: Pola Maher
Video by: Mostafa Karim
© 2018 El Joker
----------------------------
Follow El Joker on:
Facebook: https://www.facebook.com/eljokermusic
Twitter: https://twitter.com/eljokermusic
Instagram: https://www.instagram.com/eljoker_music