علي قنديل - ستاند اب كوميدي: حفلة (طفل كبير) كاملة

بعد بذل كل مجهود مُمكن، معالجة صورة من كاميرا واحدة، معالجة تراك صوت بيقطّع بالذات في الأول مع صوت الجمهور، وبعد إعادة المونتاج مرتين إحتراماً لوقتكوا..

دي أفضل نتيجة مُمكنة لتقديم الحفلة الكاملة، أوعدكوا اللي جايّة هتكون أفضل


لكل الأحباب:
- المُغتربين برّه مصر اللي كتير بيقولوا نِفسهم يحضروا حفلة..
(كل سنة بإذن الله هنزّل حفلة كاملة، هنتلاقى هنا لحد م نتقابل في المسرح)

- اللي جوّه مصر لكن بعيد، محافظات تانية..
(إحنا هنا سوا لحد م الأمور تتظبط وآجي لحد عندكوا إن شاء الله، أنا لفّيت أكتر من 22 محافظة لحد دلوقتي)

- المُكتئبين، الزعلانين، وأحياناً اليائسين..
(يمكن لما تسهروا مع الحفلة دي، تلاقوا ضحك على حاجات وقتها كانت بتوجع.. إضحكوا عليها من دلوقتي)

- الوحدانيين..
(أنا هنا.. إبقوا تعالوا حتى لو لوحدكوا)

- الكوميديانز..
(مفيش حد أحسن من حد، أذواق ومجهود.. ورزق)

- المصريين..
(أنا فخور إني واحد منكوا، وفخور بانتمائي لوطن مهما إتأذى.. عظيم بشكل سحري)

- أبويا وأمي..
(قلبي إتعلّم الحُب، وعقلي إتعلم التفكير، وروحي إتعلّمت الضحك، على إيديكوا، ألف حمد وشكر نعمة رضاكوا عليَّ)

- الجمهور..
(أتمنّى يوم تعرفوا فرحتي بكل ضحكة بترجّوا بيها المسرح، أنا كنت بدمّع من الفرحة في المونتاج وأنا بشوف ضحكتكوا!)


وأخيراً..
يمكن اللي بقدّمه مش هو المُنتَج المطلوب والرايج، مش أحسن ومش أوحش، لكن أضمن لولادي في يوم من الأيام، إن اللي بعمله دايماً مُختلف، ودايماً بتعلّم منه، وإني منتظر بفارغ الصبر يرموا عليّ إفيهيات.. ونضحك

شكراً لكل اللي بيوصلني منكوا، مشاعر، وقت، اهتمام، تذاكر، تصقيف، تصفير، لكن الأهم.. أنا مُمتن جداً لكل ضحكة من القلب معايا.. مش عليّ

علي قنديل
ستاندب كوميديان مصري


تقدروا تتابعوا مواعيد الحفلات من خلال:
- الاشتراك في قناة اليوتيوب
- متابعة الصفحة الرسمية على فيسبوك
www,facebook.com/ali.quandil

أحلى مسا